Nov
29

දෙදාහේ හෙල්මට් එක අමතක කර රුපියල් 1600 ක පොල්ගෙඩි 20ක් අරන් ගියපු අමුතු සිද්දියක්

279 Views

රුපියල් එක්දහස් හයසියයකට මිල නියම වූ පොල් ගෙඩි 20ක් රැගෙන මුදල් නොගෙවා පලා ගිය යතුරුපැදි කරුවකුට තම රුපියල් දෙදහසක් පමණ වටිනා හිස්වැස්ම අමතකව ගිය පුවතක් සාලියවැව කන්දඋඩ ප‍්‍රදේශයේ සිල්ලර වෙළෙඳසලකින් වාර්තා විය.

එම වෙළඳසලේ හිමිකරු පවසන පරිදි ඉකුත් 22 වැනි දින සවස තම වෙළඳසලට පැමිණි මැදිවියේ යතුරුපැදිකරුවෙකු එහි විකිණීමට තිබූ පොල් ගෙඩිවල මිල විමසා ඇත. මෙම අවස්ථාවේ වෙළඳසලේ සිටි බිරිය පොල්ගෙඩියක් රුපියල් අසූපහක් බව යතුරුපැදිකරුට පවසා ඇත.

තමන් පොල් රැගෙන යන්නේ පින්කමක් සඳහා බවත් එම නිසා මිල අඩුකර පොල්ගෙඩි 20ක් ලබාදෙන ලෙසත් මෙහිදී යතුරුපැදිකරු එම අවස්ථාවේදී වෙළඳසලේ හිමිකරුගේ බිරියගෙන් ඉල්ලා ඇත.

යතුරුපැදිකරුගේ එම ඉල්ලීමට අනුව පොල් ගෙඩියක් රුපියල් අසූවකට මිල නියම විය. ඒ අනුව පොල්ගෙඩි විස්සක් මිලදී ගැනීමට එකඟ වූ යතුරුපැදිකරු පොල් ගොඩෙන් තෝරාගත් ගෙඩි විස්සක් පොහොර උරයකට දමා ඇය විසින්ම ලබාදුන් ලණුවකින් උරයේ කටද ගැට ගසාගෙන ඇත.

අනතුරුව ව්‍යාපාරිකයාගේ බිරියගේද ආධාරයෙන් පොල් උරය යතුරුපැදියේ පිටුපස අසුනේ තබාගත් යතුරුපැදිකරු ඇගෙන්ම ඉල්ලා ගත් ලණුවකින් එය යතුරුපැදියේ ද ගැට ගසා ගෙන ඇත.

යතුරුපැදිකරු පොල් සඳහා මුදල් ගෙවනවා වෙනුවට තමන්ට සහල් කිලෝ පහක්ද ඉල්ලා ඇති අතර වෙළඳසල් හිමිකරුගේ බිරිය සහල් කිරීම සඳහා පිටත සිට වෙළඳසල ඇතුළට ගිය අවස්ථාවේදී යතුරුපැදිකරු එක්වරම සිය යතුරුපැදිය පණ ගන්වාගෙන අනුරාධපුර දෙසට පලාගොස් ඇත.

කෙසේ වෙතත් පලාගිය යතුරුපැදිකරුට රුපියල් දෙදහසක් පමණ වටිනා ඔහුගේ ආරක්ෂිත හිස්වැස්ම වෙළඳසල අසල සිමෙන්ති බැම්මක් මත අමතකව ගොස් තිබිණි.

ජයරත්න වික‍්‍රමාරච්චි

Do you like this post?
  • Fascinated
  • Happy
  • Sad
  • Angry
  • Bored
  • Afraid
Article එක හොදයි නම් / ලස්සනයි නම් / දෙයක් ඉගෙන ගත්තා නම් ලයික් එකක් දාලා ශෙයා කරන්න

මේ රතු පාට button එක ක්ලික් කරලා අපව සබ්ස්ක්‍රයිබ් කරන්න.
Releated Posts :

Leave a Reply